Fotos e vídeos: luz da lúa 2016

Iniciamos a noite cuns pinchos.
Comezou o Grupo de Gaitas "Os Castros".
Conforme avanzaba a noite, chegaron a participar unhas 200 persoas dos actos.
Agrupación de Gaitas "Os Castros", de Ferreira de Pantón.

 Yoan Grudikov e Tonka.

Sara Méndez Arias.
Suso Verao e María Trigo.
 Antón Valcárcel.

 Óscar Alonso, "Veliños".
Mar López Sotelo leu a Germán L. Quiroga.

 "Os Xílgaros"
 Xosé Lois García, leu un poema escrito para a ocasión.






Xº Encontro á Luz da Lúa en Cadeiras


O vindeiro sábado, 23 de xullo, pola noite, a Asociación Cultural O Colado do
Vento celebraremos o Xº Encontro á Luz da Lúa.

Será no entorno de Cadeiras, parroquia de Pinol, no campo da festa, a carón do
santuario.

Coma sempre, será unha velada na que teremos actuacións musicais e na que
convidamos ás persoas asistentes a participar (recitando, contando, cantando...
cada persoa o que desexe expresar).

Ademais do que cada quen aporte á velada, teremos as seguintes actuacións:

- GRUPO DE GAITAS “O CASTRO”

- SARA MÉNDEZ, SAXOFÓN


- CONTACONTOS MUSICADOS, TERESA GRAU


- ANTÓN VALCÁRCEL


- YOAN GRUDIKOV


Teremos uns pinchos previos (dende as 21 horas) para dar comezo á velada en
torno ás 22:15 horas.

Animamos a vir e a participar activamente, ou, simplemente, a escoitar e
desfrutar da noite.


Actividades de xullo de 2016



2 de xullo, sábado ás 19:30 h dende o bar da Festa dos Muíños.
No marco da Festa dos Muíños, faremos ruta de contos polos muíños do
Xabrega. Sendeirismo sinxelo acompañado de sesión de contacontos musicados
polos muíños do regato Xabrega. Non é preciso anotarse.

3 de xullo, domingo - Viaxe á illa de Ons.
Viaxe en bus ata porto de saída, viaxe en
barco a Ons.
En Ons, opción de rutas de sendeirismo e/ou praia.
Xantar en Ons.

9 de xullo, sábado - Ruta de sendeirismo en torno ao Cabo Home.
Cangas do Morrazo.
Ruta de aprox. 13 km de dificultade baixa.
Xantar e tempo para estar na praia. Hai que anotarse antes do 5 de xullo.

17 de xullo, domingo
Visita pola zona de Parada de Sil e Xunqueira de Espadañedo (neveiros, románico, etnografía…), especial para persoas socias.
Info: coladodovento@gmail.com
Atención: anotarse antes do 12 de xullo.

23 de xullo, sábado
Xº ANIVERSARIO DA XORNADA Á LUZ DA LÚA
Dende as 21 horas.
Entorno de Cadeiras, Pinol.
Non é preciso anotarse.

 * Queda pendente para máis adiante o concerto solidario previsto.
O COLADO DO VENTO
coladodovento@gmail.com
674473695

Visita entre o Sil, Navea e Bibei

O domingo, 24 de abril, imos facer unha saída para coñecer diversos elementos das terras do Bibei-Trives.

Achegarémonos un momento ata a igrexa de Torbeo, (concello de Ribas de Sil) para observar por fóra a súa factura románica.

A seguir, no concello de Castro Caldelas, iremos ás Mámoas do Serro, ao miradoiro da Pena do Xastre e ás mámoas de Val de Corvos, cara a zona de Mazaira.

mámoas

Xa en San Xoán de Río, iremos ata a Pena de Mouruás, á área das Guístolas, con miliarios da Vía XVIII e á Ponte Navea.


mouruás2 


miliarios

En Trives visitaremos a Pena Folenche e a Ponte do Bibei.








ponte bibei

* Saída: 10 h das Casiñas da Compañía (diante do aparcadoiro do Parque dos Condes).

* Transporte: distribuirémonos en coches particulares.

* Xantar: por conta de cada quen en Trives.

* É preciso anotarse antes do xoves ás 22 h en coladodovento@gmail.com ou 674473695

Asemblea Xeral anual 2016: 27 de febreiro ás 20 h na Biblioteca de Sober

 
Convocatoria de xuntanza da ASEMBLEA XERAL para o sábado, 27 de febreiro de 2016 , ás 20 h na Biblioteca Pública Municipal de Sober.

Orde do Día:

- Balance do traballo do ano 2015.
- Dación de contas anuais.
- Páxina web.
- Subvencións e axudas dispoñibles para 2016.
- Proposta de reorganización e/ou continuidade da Xunta Directiva, se procede.
- Ideas de actividades para 2016 e proposta de calendario.
NOTA 1: por favor, as persoas que poidades, traede o importe da cota de 2016 (20 €) en efectivo, e xa queda actualizada.

NOTA 2: quen desexe anotarse para a cea posterior, debe facelo antes do 22 de febreiro, enviando un correo a coladodovento@gmail.com ou mensaxe ou chamada ao teléfono 674473695

Recollida solidaria en Sober o 28 de decembro na feira



Dende O Colado do Vento decidimos colaborar este Nadal coa recollida solidaria que organizar a Asociación Náufragos do Paradiso para as persoas sen recursos da comarca de Lemos.

Así, o luns día 28, na feira de Sober, haberá un posto de recollida solidaria de 11 a 14 horas, onde a xente que o desexe pode depositar alimentos non perecedeiros, produtos de hixiene persoal, xoguetes, material escolar ou roupa.

A recollida está organizada en colaboración con Náufragos do Paradiso, que colabora con Cáritas, coa Cruz Vermella e coa Fundación Banco de Alimentos.
Todo o recollido polo Colado do Vento trasladarase a Asociación Náufragos do Paradiso, que o doará ás entidades solidarias para o seu reparto.

Ademais do día 28 de decembro na feira de Sober, de 11 a 14 h, as persoas que o desexen poden facer as súas doazóns en Sober antes do 31 de decembro, contactando no correo coladodovento@gmail.com ou no teléfono 674473695.

Neste Nadal, con este pequeno xesto de solidariedade, pedimos xustiza para que ninguén pase fame nin penurias.

O COLADO DO VENTO
Decembro, 2015

Un bifaz en Lobios e unha lasca en Proendos? Novos achádegos paleolíticos en Sober

Bifaz do Monte de Lobios.
Este ano 2015, atopáronse en Sober dous novos achádegos que, moi probablemente, pertencen ao Paleolítico: un bifaz e unha lasca, útiles de cuarcita.

Ambos obxectos estarían datados no Paleolítico Inferior, pertencendo ao conxunto de industrias achelenses do Pleistoceno Medio, ou Modo 2, (620.000 - 300.000 anos antes do presente), elaboradas polas comunidades de Homo Heidelberguensis.

Bifaz do Monte de Lobios.

O bifaz apareceu en novembro no Monte de Lobios, atopado por Paula Vázquez Verao nun camiño. 

Bifaz do Monte de Lobios.

A lasca foi atopada en Froxán, Proendos, polo Manolo do Cápito de Sante.

Lasca de Froxán.

Lasca de Froxán.
Estas pezas, que temos O Colado do Vento, poñémolas a disposición das persoas investigadoras para que as poidan estudar, pero lamentamos non poder doalas a un museo inexistente que debería haber en Monforte. Dende o ano 2006, o val de Lemos é un lugar privilexiado para o estudo sistemático do Paleolítico galego, mais non se conta cun espazo en Monforte onde poder amosar os múltiples achádegos nin explicar a súa interpretación.


* A nova no xornal La Voz de Galicia, con palabras de Arturo de Lombera: aquí.

* Outros achádegos paleolíticos en Sober: aquí.

Ruta da feira de Parada: reencontro entre "caldelaos e lemeses"

* Track en wikiloc da ruta aquí.


Cedo nunha mañá de néboa mesta, O Colado do Vento dispuxémonos a saír de ruta dende Barantes, parroquia no Concello de Sober, ata Parada de Sil, da banda ourensá, recuperando os vellos camiños do río polos que os "antigos d'antes" cruzaban para ir dende as terras de Sober ata a feira de Parada.

Ata a feira de Parada ían rosqueiros da Somoza a vender o seu produto, cargadiñas as roscas na burra ou ao lombo, ou ían xentes labregas de Sober a mercar as xatas, que logo usaban ou vendían xa medradas nas feiras de Lemos.

O río había que pasalo en barca, pola barca da Somoza ou, logo de asulagadas as terras polo encoro de Santo Estevo - encheuse durante a vendima do ano 1954-, na mesma zona, coa barca do Barril.

O detonante da ruta foi a lembranza das vellas peripecias da vaca Cachorra, un animal nunca amansado, á que o Xosé Verao trouxo dende Parada: que a ver como faría para pasar o río e subir logo polos camiños ribeiraos! E o deseño e acondicionamento da ruta hai que llo agradecer ao Suso Verao, que pasou longas xornadas pensando e limpando o traxecto, botando man tamén da sabedoría do Quintín de Barreiros - que lembrou vellos camiños do río -, de Tomás, biólogo e mestre do IES Río Cabe, ou das fotografías de Nacho.


É polo tanto, esta, a recuperación dunha paisaxe vivida, de medida humana, e non unha postal estática.






O ritmo da ruta marcouno a visualización das diversas especies de flora de ámbito maioritariamente mediterráneo, comezando por grandes acivros en Barantes ata a multitude de sobreiras e aciñeiras do lado lemés e castiñeiros do lado caldelao, ou a omnipresencia dos érvedos, dos que desfrutamos os morotes.


Primeiro, con inicio no Sagrado, ao carán da igrexa de Barantes, fomos achegándonos á ribeira de Barantes, pasando antes pola Riba, para descender dende A Barrionca ata Os Groís e logo ata a zona dos Pousos, onde tiña barca o Barril.
 
Cruzamos o río da man de Álex e Keka, de Turismo en la Ribeira Sacra;


... e comezamos a ascender entre soutos e sequeiros, para alcanzar o regato de Portela, o lugar de Portela e logo Parada.


Sequeiro.
Regato de Portela.


Xa pola tarde, despois de xantar, visitamos Castro, fermoso lugar de impresionantes vistas cara a ribeira de Bolmente, e a Casa Museo do Chocolate, onde contemplamos as máquinas de Chocolates Caldelas, que abastecía de tabletas á zona de Caldelas e a Sober e Monforte.
 


 
En Castro, Iván Álvarez Merayo e Óscar Alonso, ao mesmo tempo, atoparon coviñas na pena que sustenta un dos apoios do miradoiro; e Sandoval outra pena na croa do castro.


Logo da magnífica xornada que pasamos, non poden faltar os agradecementos.

En primeiro lugar, a todas as persoas que nos acompañastes, polo ambiente e por contribuír ao financiamento desta actividade. Vós sodes quen facedes "Colado do Vento". De moitas das 50 persoas que participastes, era a vosa primeira vez: agardámosvos de novo!


Ao Concello de Sober, por colaborar aportando os gastos de autobús. E a Luis, o seu alcalde, por acompañarnos.

Ao Concello de Parada de Sil, por axudarnos a organizar, por colaborar e por abrir para nós o Museo do Chocolate, da antiga fábrica de chocolate de Teimende. E a Yolanda, a súa alcaldesa, por acompañarnos na ruta e en outros días e darnos múltiples facilidades.

A todas as empresas e proxectos cos que contratamos ou dos que precisamos servizos.

E, moi especialmente, a Xesús Verao, por preparar a ruta e recuperar os vellos camiños e relacións entre "caldelaos e lemeses".